வண்ணம் தீட்டும் படங்கள்: இலவசமாக அச்சிட்டுக்கொள்ளுங்கள்

படங்களைத் தேர்ந்தெடுங்கள்

மூன்று தொகுப்புகள். பிடித்த படத்தை அச்சிடுங்கள் அல்லது ஃபோனில் பதிவிறக்கிக்கொள்ளுங்கள்.

ஏன் இந்தப் படங்கள் இப்படி இருக்கின்றன

இணையத்தில் வண்ணம் தீட்டும் படங்களுக்குப் பஞ்சமில்லை. ஆனால் அவற்றில் பெரும்பாலானவை வேறொரு நாட்டின் குழந்தைகளுக்காக வரையப்பட்டவை — பனிமனிதன், ஹாலோவீன் பூசணி, குளிர்கால மரங்கள். நம் குழந்தை அவற்றில் எதையும் வாழ்க்கையில் பார்த்ததில்லை.

இங்கே உள்ள படங்கள் அவர்கள் தினமும் பார்க்கும் விஷயங்கள். வாசலில் கோலம் போடுவது. பொங்கல் பானை பொங்கி வழிவது. ஆட்டோவில் பயணம். வாழையிலையில் சாப்பாடு. பள்ளிப் பையை மாட்டிக்கொண்டு கிளம்பும் காலை. மழைக்குட்டையில் காலை வைத்துத் தெறிக்க விடுவது.

இரண்டாவது தொகுப்பு தமிழ்நாட்டின் இடங்கள் — மெரினா, மாமல்லபுரம், ஊட்டி மலை ரயில், கொடைக்கானல் ஏரி, குற்றாலம் அருவி, கன்னியாகுமரி. இவை வெறும் படங்கள் அல்ல; வண்ணம் தீட்டிக்கொண்டே 'இங்கே போயிருக்கிறோமா' என்று பேச ஒரு வாய்ப்பு.

மூன்றாவது தொகுப்பு கோயில்களும் தெய்வங்களும். விநாயகர் சதுர்த்தி, தைப்பூசம், நவராத்திரி போன்ற நாட்களில் குழந்தைக்கு ஒரு வேலை கொடுக்க இவை உதவும்.

எல்லாப் படங்களும் தடிமனான, தெளிவான கோடுகளுடன் வரையப்பட்டவை. மிகச் சிறிய விவரங்கள் வேண்டுமென்றே தவிர்க்கப்பட்டிருக்கின்றன — சின்னக் குழந்தையின் கை அவ்வளவு நுணுக்கமாக நகராது, அதனால் ஏற்படும் ஏமாற்றம் வண்ணம் தீட்டுவதையே வெறுக்க வைக்கும்.

வண்ணம் தீட்டுவது எதற்கு உதவுகிறது

முதலாவது, பென்சிலைப் பிடிக்கும் பழக்கம். எழுத ஆரம்பிப்பதற்கு முன்பு விரல்களுக்குத் தேவையான வலிமையும் கட்டுப்பாடும் வர வேண்டும். கிரையனை அழுத்தி, திசை மாற்றி, ஒரு எல்லைக்குள் நிறுத்த முயற்சிப்பது — இவை எழுத்துக்கு நேரடியாகத் தயார் செய்யும் பயிற்சிகள்.

இரண்டாவது, ஒரே இடத்தில் அமர்ந்திருக்கும் திறன். ஒரு படத்தை முடிக்க பத்து பதினைந்து நிமிடங்கள் தேவைப்படும். அது ஒரு மூன்று வயதுக் குழந்தைக்குப் பெரிய காலம். இந்தப் பழக்கம் பள்ளியில் பயன்படும்.

மூன்றாவது, பேச்சு. வண்ணம் தீட்டும்போது குழந்தை அமைதியாக இருக்கிறது, ஆனால் காது திறந்திருக்கிறது. அப்போது கேட்கும் கேள்விகள் நன்றாக வேலை செய்யும் — 'இது என்ன பூ?', 'கோலம் யார் போடுவாங்க?', 'இந்த ரயில் எங்கே போகும்?'

நான்காவது, அமைதி. திரையைத் தவிர்த்து ஒரு குழந்தையை அமர வைப்பது கடினம். இது அதற்கு ஒரு எளிய மாற்று — சத்தமில்லாதது, மின்சாரம் தேவையில்லாதது, முடிந்ததும் சுவரில் ஒட்டி வைக்கக்கூடியது.

இதற்குப் பெரிய வாக்குறுதிகள் தேவையில்லை. இது புத்திசாலித்தனத்தை அதிகரிக்கும் என்றோ, மூளையை வளர்க்கும் என்றோ நாங்கள் சொல்லப் போவதில்லை. இது ஒரு நல்ல, அமைதியான, மலிவான விளையாட்டு. அது போதும்.

எந்த வயதில் என்ன எதிர்பார்க்கலாம்

இரண்டு வயதில் குழந்தை கோடுகளைக் கண்டுகொள்ளாது. காகிதம் முழுவதும் ஒரே வண்ணத்தில் கிறுக்கும். அது சரி — அதுதான் அந்த வயதின் வேலை. தடிமனான, உடையாத கிரையன்கள் கொடுங்கள்.

மூன்று வயதில் 'இது யானை' என்று அடையாளம் காணத் தொடங்குவார்கள், ஆனால் வண்ணம் இன்னும் கோட்டைத் தாண்டியே போகும். இங்கே ஒரு விஷயத்தைச் செய்யாதீர்கள் — திருத்த வேண்டாம். 'கோட்டுக்குள்ள போடு' என்று சொல்வது அந்த நேரத்தில் ஒரு வேலையாக மாற்றிவிடும். யானையை ஊதா நிறத்தில் தீட்டினால் அது ஊதா யானைதான்.

நான்கு ஐந்து வயதில் எல்லைகளுக்குள் நிற்கத் தொடங்குவார்கள், வெவ்வேறு பகுதிகளுக்கு வெவ்வேறு வண்ணம் தேர்ந்தெடுப்பார்கள். இப்போது 'சாயங்கால வானம் என்ன கலர்?' போன்ற கேள்விகள் சுவாரஸ்யமாக இருக்கும்.

ஆறு வயதுக்கு மேல் விவரங்கள் மீது ஆர்வம் வரும் — பின்னணி சேர்ப்பது, தங்கள் பெயரை எழுதுவது, கதை சேர்ப்பது. இந்த வயதில் கோயில் மற்றும் இடங்கள் தொகுப்பு நன்றாகப் பொருந்தும்.

மிகச் சிறிய குழந்தையிடம் கவனம் தேவை. மூன்று வயதுக்குக் குறைவான குழந்தைகள் கிரையனை வாயில் வைப்பார்கள். விஷமற்றது என்று குறிக்கப்பட்ட, பெரிய அளவிலான கிரையன்களை மட்டும் கொடுங்கள், அருகிலேயே இருங்கள். சிறிய ஸ்கெட்ச் பேனா மூடிகள் மூச்சுத் திணறல் ஆபத்தானவை.

அச்சிடும்போது

படங்கள் A4 அளவில் தயாரிக்கப்பட்டவை. சாதாரண அச்சுத் தாளே போதும். ஸ்கெட்ச் பேனா பயன்படுத்தினால் மை பின்பக்கம் ஊடுருவும், அதனால் சற்று தடிமனான தாள் இருந்தால் நல்லது — ஆனால் அது கட்டாயமில்லை.

அச்சுப் பெட்டியில் 'கருப்பு வெள்ளை' அல்லது 'greyscale' என்பதைத் தேர்ந்தெடுங்கள். இவை கோட்டுப் படங்கள், வண்ண மை தேவையே இல்லை — அப்படிச் செய்தால் மை மிச்சமாகும்.

ஒரு நடைமுறை யோசனை: ஒரே படத்தை இரண்டு பிரதிகள் அச்சிடுங்கள். வீட்டில் இரண்டு குழந்தைகள் இருந்தால் சண்டை வராது. ஒரு குழந்தை மட்டும் என்றால் நீங்களும் ஒன்றை எடுத்துக்கொண்டு பக்கத்தில் அமர்ந்து தீட்டுங்கள் — அவர்களுக்கு அதுவே அன்றைய சிறந்த விஷயமாக இருக்கும்.

வீட்டில் அச்சுப்பொறி இல்லையென்றால் படத்தைப் பதிவிறக்கி, ஃபோனில் வைத்துக்கொண்டு அருகிலுள்ள ஜெராக்ஸ் கடையில் அச்சிட்டுக்கொள்ளலாம். ஒரு தாள் ஒரு சில ரூபாய்தான்.

பள்ளிகளும் அங்கன்வாடிகளும் தாராளமாக இவற்றை அச்சிட்டுப் பயன்படுத்தலாம் — வகுப்புக்கு எத்தனை பிரதிகள் வேண்டுமானாலும். இவை இலவசம், அதற்காகவே இருக்கின்றன.

முடிந்த படத்தை வீசிவிடாதீர்கள். குழந்தையின் பெயரையும் தேதியையும் ஒரு மூலையில் எழுதி, குளிர்சாதனப் பெட்டியில் ஒட்டி வையுங்கள் அல்லது ஒரு கோப்பில் சேர்த்து வையுங்கள். ஆறு மாதம் கழித்து அதைத் திரும்பப் பார்க்கும்போது கை எவ்வளவு மாறியிருக்கிறது என்பது உங்களுக்குத் தெரியும் — குழந்தைக்கும் அது ஒரு பெருமை.

வண்ணம் தீட்டிக்கொண்டே தமிழ் கற்பிக்கலாம்

வெளிநாட்டில் வாழும் தமிழ்க் குடும்பங்களுக்கு இது ஒரு பயனுள்ள வழி. குழந்தை படத்தில் மூழ்கியிருக்கும் அந்த பத்து நிமிடங்களில், பாடம் என்று தோன்றாமல் வார்த்தைகள் உள்ளே போகும்.

எளிமையாகத் தொடங்குங்கள் — வண்ணங்களின் பெயர்கள். சிவப்பு, மஞ்சள், பச்சை, நீலம். 'இந்தப் பூவை என்ன கலர்ல போடப் போற?' என்று தமிழிலேயே கேளுங்கள். பதில் ஆங்கிலத்தில் வந்தாலும் திருத்தாதீர்கள்; நீங்கள் தமிழில் திரும்பச் சொன்னால் போதும்.

பிறகு படத்தில் இருக்கும் பொருட்கள். இட்லி, தோசை, வாழையிலை, கோலம், கரும்பு, மயில், அகல் விளக்கு, அருவி. இவை பாடப் புத்தகத்தில் வராத, ஆனால் வீட்டில் தேவைப்படும் வார்த்தைகள்.

பெரிய குழந்தைகளுக்கு ஒரு படி மேலே செல்லலாம் — படத்தைப் பற்றி இரண்டு வரி தமிழில் எழுதச் சொல்லுங்கள், அல்லது படத்தின் பின்புறம் பெயரை எழுதச் சொல்லுங்கள். கட்டாயம் வேண்டாம்; விருப்பம் இருந்தால் மட்டும்.

நமது கட்டுரைத் தொகுப்பில் தமிழ்க் கட்டுரைகள், தாலாட்டுகள், வீட்டுக்குள் விளையாடும் விளையாட்டுகள் ஆகியவையும் இருக்கின்றன — அவற்றையும் இதனுடன் சேர்த்துப் பயன்படுத்தலாம்.

அடிக்கடி கேட்கப்படும் கேள்விகள்

கேள்வி: இவை உண்மையிலேயே இலவசமா? பதிவு செய்ய வேண்டுமா? — இலவசம். பதிவு தேவையில்லை, மின்னஞ்சல் தேவையில்லை, எதுவும் தேவையில்லை. அச்சிடுங்கள் அல்லது பதிவிறக்குங்கள், அவ்வளவுதான்.

கேள்வி: பள்ளியில் அல்லது அங்கன்வாடியில் பயன்படுத்தலாமா? — தாராளமாக. வகுப்புக்குத் தேவையான எத்தனை பிரதிகள் வேண்டுமானாலும் அச்சிட்டுக்கொள்ளுங்கள். விற்பனைக்கு மட்டும் பயன்படுத்த வேண்டாம்.

கேள்வி: குழந்தை கோட்டுக்கு வெளியே வண்ணம் போடுகிறது. திருத்த வேண்டுமா? — வேண்டாம். எல்லைக்குள் நிற்கும் திறன் நான்கு ஐந்து வயதில் தானாகவே வரும். அதற்கு முன் திருத்துவது வண்ணம் தீட்டுவதை ஒரு தேர்வாக மாற்றிவிடும். அவர்கள் விரும்பியபடி போடட்டும்.

கேள்வி: இன்னும் புதிய படங்கள் வருமா? — வரும். எந்த மாதிரியான படங்கள் வேண்டும் என்று நினைக்கிறீர்கள் என்பதைத் தொடர்பு பக்கத்தின் மூலம் எங்களுக்குச் சொல்லுங்கள். திருவிழாக்கள், விலங்குகள், தமிழ் எழுத்துகள் — கேட்பவை அதிகம் வரும் வரிசையிலேயே சேர்ப்போம்.